«Түркістан БГҚ» Басқарма төрағасы Қазақстан-Корея іскерлік кеңесінің отырысына қатысты

«Түркістан БГҚ» ЖШС Басқарма төрағасы Ұлан Бүркітов «Самұрық-Қазына» АҚ компаниялар тобы делегациясының құрамында Сеулде өткен Қазақстан-Корея іскерлік кеңесінің 14-отырысына қатысты. Іс-шара бүгін, 2026 жылғы 15 қыркүйекте Қазақстан Республикасының Президенті Қасым-Жомарт Тоқаевтың Корея Республикасына мемлекеттік сапары аясында өтті.

 Отырыстың негізгі тақырыбы екіжақты әріптестікті нығайту болды. Қатысушылар инвестициялық диалогты кеңейту, озық технологиялар трансфері және бірлескен бастамаларды іске қосу мәселелерін талқылады. Энергетика дәстүрлі түрде ынтымақтастықтың негізгі бағыттарының бірі болып қала береді.

Іскерлік кеңес аясында Ұлан Бүркітов Doosan Enerbility Co., Ltd. атқарушы вице-президенті және құрылыс бағытының жетекшісі Лим Кванг Джэмен жұмыс кездесуін өткізді. Тараптар «Түркістан БГҚ» станциясының құрылыс қарқынын, өзекті міндеттерді және алдағы үйлестіру стратегиясын егжей-тегжейлі талқылады.

Оңтүстік Кореяның ірі өнеркәсіптік компаниясы Doosan Enerbility Co., Ltd. «Integra Construction KZ» ЖШС-мен бірлесіп Түркістан облысындағы электр станциясын салу жөніндегі EPC-консорциумды басқарады. Жоба энергетика саласындағы мемлекетаралық өнеркәсіптік кооперацияның ауқымды үлгілерінің бірі болып табылады.

Қазақстан-Корея іскерлік кеңесі аясында «Түркістан БГҚ» ЖШС мен «Қазақстанның Даму Банкі» АҚ 290,5 млрд теңге сомасына кредиттік желі ашу туралы келісім жасасты. Қаржыландыру «Түркістан БГҚ» жобасын одан әрі іске асыруға бағытталады. Құжатқа «Түркістан БГҚ» ЖШС Басқарма төрағасы Ұлан Бүркітов және «Қазақстанның Даму Банкі» АҚ Басқарма төрағасы Марат Елібаев қол қойды.