200 тонналық агрегат орнатылды: Siemens компаниясының екінші газ турбинасының монтажы аяқталды

Оңтүстік Қазақстандағы стратегиялық маңызы бар энергетикалық нысан – қуаты 1000 МВт болатын біріктірілген циклді парогаз қондырғысының (БГҚ) құрылысы кезекті маңызды кезеңге жетті. Станцияның Негізгі корпусында Siemens Energy өндірісінің екінші газ турбинасы сәтті орнатылды.

Салмағы шамамен 200 тонна болатын бұл турбина 600 тонналық гусенокранының көмегімен көтеріліп, технологиялық ойық арқылы жобалық орнына дәл түсірілді.

Айта кетейік, монтаж барысында алғашқы газ турбинасын жеткізу және орнату кезінде жинақталған құнды тәжірибе толық қолданылды. Инженерлердің айтуынша, мұндай ауқымдағы жұмыс жоғары дәлдікті есептеуді, соның ішінде кран жебесінің шығу қашықтығын және строптау нүктелерін нақты анықтауды талап етті. Барлық операциялар әзірленген Жұмыстарды орындау жобасына сәйкес қатаң тәртіпте жүзеге асырылып, монтаждың қауіпсіздігі мен табысты орындалуын қамтамасыз етті.

Күрделі логистикалық операцияларды жеткізу және басқару жұмыстарын бас мердігерлер консорциумы қамтамасыз етті. Консорциумды Doosan Enerbility басқарады. Жобаның инжинирингі мен жалпы менеджментіне жауап беретін жетекші компанияның қазақстандық серіктесі Integra Construction KZ негізгі құрылыс-монтаж жұмыстарын атқарады.

Қазіргі уақытта газ турбинасы уақытша тіректерге орнатылған. Келесі кезең – осы агрегаттың генераторын монтаждау.

Қуаты 1000 МВт-қа дейінгі БГҚ құрылысы «БГҚ Түркістан» Серіктестігі тарапынан жүзеге асырылып, Қазақстанның оңтүстік өңірлерінің энергетикалық тұрақтылығын нығайтуға бағытталған.