ҚР Энергетика министрінің штаттан тыс көмекшісі «Түркістан БГҚ» құрылысының барысымен танысты

Қазақстан Республикасы Энергетика министрінің тапсырмасы бойынша оның штаттан тыс көмекшісі Батыржан Каракозов «Түркістан БГҚ» ЖШС құрылыс алаңына барды. Жұмыс сапары барысында ол қуаты 1000 МВт бу мен газ қондырғысы базасындағы электр станциясы құрылысының барысымен танысты.

Жұмыстардың ағымдағы мәртебесі туралы «Түркістан БГҚ» ЖШС Басқарма төрағасы Ұлан Бүркітов, бас мердігер консорциумының өкілдері - Doosan Enerbility және «Integra Construction KZ» ЖШС, сондай-ақ құрылысқа қатысып жатқан өзге ұйымдардың өкілдері баяндады.

Құрылыс алаңындағы өндірістік кеңес барысында қатысушылар жобаның сыни жолындағы нысандарды аралап өтті. Дәл осы учаскелер электр станциясын іске қосу мен алғашқы қуатты беруге тікелей әсер етеді. Батыржан Каракозовке суық іске қосуға арналған дизель-генератор қондырғыларының аумағы көрсетілді, мұнда төрт бірлік жабдық орнатылған.

Аралау бағытына салынып жатқан оперативтік басқару пункті, ашық тарату құрылғысы, бас корпус, газ турбинасының қалдық жылу қазандығы элементтерін монтаждау алаңы, бу турбиналарына арналған іргетастарды дайындау аймағы, ауамен салқындатылатын конденсаторлық қондырғыны құрастыру және монтаждау аумағы, газ дайындау пункті және әкімшілік-тұрмыстық корпус та енгізілді.

Талқылау барысында құрылыс-монтаж жұмыстарының нақты қарқыны, негізгі учаскелердің мәртебесі және бұған дейін берілген тапсырмалардың орындалуы қаралды.

«Алаңдағы жұмыс жүйелі түрде ұйымдастырылған, барлық үдерістер дұрыс жолға қойылған, бұл сырт көзге де анық байқалады. Ендігі маңызды міндет - бақылаудың жоғары деңгейін сақтау, барлық қатысушылардың нақты үйлесімді іс-қимылын қамтамасыз ету және жобаны іске асыру қарқынының төмендеуіне жол бермеу», - деп атап өтті ҚР Энергетика министрінің штаттан тыс көмекшісі Батыржан Каракозов.

Айта кетейік, Батыржан Каракозов - инженер-электрик, техника ғылымдарының кандидаты. Оның энергетика саласында, соның ішінде басшылық қызметтерде көпжылдық тәжірибесі бар. Әр жылдары ол Ядролық физика институтын, өңірлік электр желілерін тарату компаниясын басқарған, сондай-ақ ҚР Энергетика министрлігінде басшылық қызметтер атқарған.