Қазақстан Республикасының жаңа Конституциясындағы экологиялық басымдықтар «Түркістан БГҚ» алаңында талқыланды

Құрылыс алаңында Қазақстан Республикасының жаңа Конституциясындағы экологиялық нормаларды түсіндіруге арналған кездесу өтті. Іс-шараға «Түркістан БГҚ» ЖШС басшылығы мен қызметкерлері, Doosan Enerbility және «Integra Construction KZ» ЖШС компаниялары консорциумының өкілдері, сондай-ақ станция құрылысына тартылған мердігер ұйымдар қатысты.

Қатысушылар табиғатты қорғау, табиғи ресурстарды ұтымды пайдалану және жұмыстардың барлық кезеңінде табиғат қорғау талаптарын сақтау жөніндегі конституциялық міндетті талқылады. «Түркістан БГҚ» ЖШС үшін бұл тақырыптың тікелей маңызы бар. Компания қуаты 1000 МВт бу мен газ электр станциясын салу жобасын іске асыруда. Бұл станция Қазақстанның оңтүстігіндегі негізгі энергетикалық нысандардың біріне айналады. Станция Түркістан облысы мен Шымкент қаласындағы энергия тапшылығын төмендетуге, сондай-ақ өңірді электрмен жабдықтау сенімділігін арттыруға ықпал етеді.

Жоба ең озық қолжетімді технологияларды қолдануды көздейді. Бу мен газ циклы табиғи газды тиімдірек пайдалануға, отынның әрбір бірлігіне шаққанда көбірек электр энергиясын өндіруге және дәстүрлі генерациямен салыстырғанда экологиялық жүктемені азайтуға мүмкіндік береді. Кездесу барысында құрылыс алаңындағы экологиялық тәртіп мәселелері де қаралды: қалдықтарды бақылау, аумақтың ластануына жол бермеу, ресурстарды ұтымды пайдалану және қоршаған ортаға төнетін қауіптер туралы ақпаратты жасырғаны үшін лауазымды тұлғалардың жауапкершілігі.

«Біз қоршаған ортаны қорғау қарапайым техникалық қағидалар деңгейінен конституциялық міндет және маңызды мемлекеттік басымдық мәртебесіне өткенін атап өттік. Бұл жұмыстардың әр кезеңінде қатаң тәртіпті талап етеді. Экологиялық стандарттарды қатаң сақтау енді таңдау емес, станцияны сәтті іске қосудың басты әрі баламасыз шарты», - деп атап өтті «Түркістан БГҚ» ЖШС Өнеркәсіптік қауіпсіздік және еңбекті қорғау департаментінің бас маман-экологы Ақмарал Джумабекова.

«Түркістан БГҚ» ЖШС-де жаңа Конституция ережелері бойынша түсіндіру жұмыстары жалғасады. Мұндай кездесулер қызметкерлер мен мердігерлерге экологиялық нормалардың құрылыс алаңындағы күнделікті жұмыспен қалай байланысты екенін түсінуге көмектеседі.