Бақылау кеңесінің мүшелері «Түркістан БГҚ» құрылысының барысымен танысты

Басқарма төрағасы Ұлан Бүркітов және бас мердігерлік консорциум өкілдері - Doosan Enerbility мен Integra Construction KZ - жобаның іске асырылу барысын таныстырды. Атап айтқанда, негізгі алаңдағы жұмыстардың мәртебесі, кестелердің орындалуы және алғашқы қуатты энергожүйеге беруге дайындық бойынша міндеттер баяндалды.

Алаңда бас корпус, ауамен салқындатылатын конденсаторлық қондырғылар, жедел басқару пункті және 220/500 кВ ашық тарату құрылғысы бойынша жұмыстар жалғасуда. Екі қалдық жылу қазандығында негізгі модульдер орнатылып, оларды газ турбиналарымен түйістіру жұмыстары жүргізілуде. Сыртқы газбен жабдықтау жұмыстарының дайындығы 97,4%-ды құрайды.

«Негізгі алаңды, қуатты энергожүйеге беруді және қосалқы инфрақұрылымды синхрондау маңызды. Басты назарда - кестелер, сапа, ресурстар және қатысушылардың үйлесімді жұмысы», - деп атап өтті Ұлан Бүркітов.

Нысандарды аралап көргеннен кейін «Түркістан БГҚ» ЖШС, Doosan Enerbility және Integra Construction KZ қатысуымен өндірістік кеңес өтті. Кеңесте кестелер, ресурстар, жұмыс сапасы және сыни жол бойынша үйлестіру мәселелері талқыланды.

Ғабидолла Әбдірахымов салынып жатқан станция Қазақстандағы бу мен газ қондырғысы базасындағы ең ірі заманауи электр станцияларының бірі болатынын атап өтті. Оның айтуынша, жоба газды тиімдірек пайдалануға, көмір генерациясымен салыстырғанда шығарындыларды азайтуға, Қазақстанның оңтүстігіндегі электр энергиясы тапшылығын төмендетуге және біртұтас энергожүйені нығайтуға мүмкіндік береді.

«Бұл - ел үшін өте маңызды жоба. Бүгін әрқайсыңыз үлкен жұмыс атқарып жатырсыздар. Осындай ауқымды нысанды сапалы әрі уақытылы аяқтау - бәрімізге ортақ жауапкершілік», - деді Ғабидолла Әбдірахымов.

Қатысушылар сондай-ақ жобаның сыртқы инфрақұрылым контурына кіретін 220 кВ «Шымкент - Састөбе» әуе желісі учаскесін қарап шықты.