Мәдени ауылының тұрғындармен кездесу

«Түркістан БГҚ» ЖШС Басқарма төрағасы Қуаныш Бектеміров Түркістан облысы Төлеби ауданына қарасты Мәдени ауылының ақсақалдарымен құрылыс алаңында кездесті. Аймақтың ең ірі инвестициялық жобасы елді мекенге жақын орналасқан.

Түркістан БГҚ өкілдері ауыл тұрғындарына болашақ бу-газ электр станциясының макетін таныстырып, оның экологиялық тұрғыдан қауіпсіз әрі тиімді болатынын түсіндірді. Мәдени ауылының тұрғындары құрылыс барысын мұқият бақылауда.

Кездесу барысында ауыл ақсақалдары «Түркістан БГҚ» ЖШС  басшылығына бірқатар әлеуметтік мәселелер бойынша өтініш білдірді. Олардың басым бөлігі жергілікті атқарушы органдардың құзыретіне жататындықтан, Басқарма төрағасы Қуаныш Бектеміров компанияның қаржылық институттардан алынған несие қаражатын тек жобаны іске асыру мақсатында пайдаланатынын түсіндірді.

Өз кезегінде, «Түркістан БГҚ» басшылығы компания өзіне алған барлық міндеттемелерді орындайтынын мәлімдеді. Атап айтқанда, құрылыс аймағын көгалдандыру, қоршаған ортаға әсерді барынша азайту, сондай-ақ Мәдени, Қарамұрт ауылдарынан тартылған жұмысшыларға еңбекақыны уақытылы төлеу мәселесі жіті назарда болады. Сонымен қатар, станция іске қосылғаннан кейін де онда жергілікті тұрғындардан шыққан білікті мамандар еңбек ететін болады.

Кездесу қорытындысы бойынша мәдениеліктер электр станциясының құрылысына толық қолдау білдіріп, ізгі батасын берді.