Мәулен Айманбетов «Түркістан БГҚ» құрылысының барысымен танысты

«Samruk-Kazyna Construction» АҚ Басқарма төрағасы Мәулен Айманбетов «Samruk-Kazyna Construction» АҚ сенімгерлік басқаруындағы «Түркістан БГҚ» ЖШС құрылыс алаңына жұмыс сапарымен барды.

Сапар аясында Мәулен Айманбетов «Түркістан БГҚ» ЖШС басшылығымен және бас мердігерлер консорциумының өкілдері - Doosan Enerbility және Integra Construction KZ компанияларымен бірге негізгі нысандарды аралап көрді. Атап айтқанда, бас корпус, ашық тарату құрылғысы, электрқалқан, қалдық жылу қазандықтарының алаңы және газ дайындау пункті қаралды.

Өндірістік кеңесте «Түркістан БГҚ» ЖШС Басқарма төрағасы Ұлан Бүркітов құрылыс-монтаж жұмыстарының қазіргі барысы, жобаны іске асыру мәртебесі және әрбір нысан бойынша міндеттер туралы баяндады. Алаңда күн сайын өндірістік кеңестер өткізілетіні, ал аптасына екі рет хаттамалық тапсырмалардың орындалуы қаралатыны атап өтілді. Бұл құрылыс қарқынын бақылауға және туындайтын мәселелерге жедел ден қоюға мүмкіндік береді.

Назарда жобаның сыни жолындағы учаскелер, электр станциясын уақтылы іске қосу міндеттері және құрылысқа қатысушылардың барлығының үйлесімді іс-қимылын талап ететін мәселелер болды. Сапар қорытындысы бойынша Мәулен Айманбетов атқарушылық тәртіпті күшейтіп, ресурстарды басым бағыттарға шоғырландыруды тапсырды.

«Бұл электр станциясы халық үшін салынып жатыр - адамдарды, бизнесті және экономиканы сенімді электр энергиясымен қамтамасыз ету үшін. Сондықтан құрылысшылар мен жоба командасының алдында жауапты міндет тұр - құрылысты мерзімінде аяқтап, елге қажетті энергетикалық қуатты беру. Ол үшін бар күш-жігермен, нақты, үйлесімді және нәтижеге бағытталып жұмыс істеу қажет», - деді Мәулен Айманбетов.

Жұмыс сапары «Samruk-Kazyna Construction» АҚ тарапынан жобаны іске асыру барысына жоғары деңгейде назар аударылып отырғанын және құрылыстың барлық кезеңінде жүйелі бақылаудың маңызын тағы бір мәрте растады.