«Samruk-Kazyna Construction» АҚ басшылығы «Түркістан БГҚ» ЖШС-не жұмыс сапарымен келді

«Samruk-Kazyna Construction» АҚ Басқарма төрағасының пайдалану жөніндегі орынбасары Ғабидолла Әбдірахымов және «Samruk-Kazyna Construction» АҚ Басқарма төрағасының активтерді басқару және цифрландыру жөніндегі орынбасары Аман Асанов «Түркістан БГҚ» ЖШС-не жұмыс сапарымен барды.

Сапардың басты мақсаты - қуаты 1000 МВт бу-газ қондырғысы (БГҚ) базасындағы электр станциясы құрылысының қарқынын бағалау және қазақстандық энергия жүйесі үшін стратегиялық маңызды нысанды іске асыру кестесінің сақталуын бақылау.

Компания кеңсесіндегі кеңестен кейін «Samruk-Kazyna Construction» АҚ және «Түркістан БГҚ» ЖШС басшылығы, бас мердігер - Doosan Enerbility (Оңтүстік Корея) мен Integra Construction KZ (Қазақстан) консорциумының өкілдері, сондай-ақ Түркістан облысы Сайрам ауданының әкімі құрылыс алаңына арнайы барды.

Делегация аумағы 60 гектарды құрайтын құрылыс басын аралап көрді. Бас мердігер өкілдері ағымдағы құрылыс-монтаж жұмыстары (ҚМЖ), сондай-ақ БГҚ негізгі жабдықтарын монтаждаудың басталғаны туралы баяндады. «Samruk-Kazyna Construction» басшылығының сапары кезінде Бас корпуста ауыр кранның көмегімен газ турбинасының генераторын жылжыту жұмыстары жүргізілді.

«Түркістан БГҚ» ЖШС Басқарма төрағасы Ұлан Бүркітов аралық нәтижелер туралы баяндады. Жоба негізгі технологиялық жабдықтарды монтаждаудың белсенді фазасына өтті:

 • Бас корпуста үш газ турбинасы және басқару жүйелерінің элементтері орнатылды; 

• Алаңға жабдықтың 80%-дан астамы жеткізілді, оның ішінде күштік тораптар: 4 газ турбинасы, 2 бу турбинасы, кәдеге жарату қазандықтары және генераторлар бар.

«Samruk-Kazyna Construction» АҚ басшылығы жобаның ерекше бақылауда екенін және Мемлекет басшысының тапсырмасына сәйкес жүзеге асырылып жатқанын атап өтті. Станцияны уақытылы пайдалануға беру Қазақстанның энергетикалық держава ретіндегі мәртебесін нығайту үшін өте маңызды.

Инспекция қорытындысы бойынша мердігер ұйымдарға жұмыс қарқынын күшейту және құрылыс сапасын халықаралық қауіпсіздік стандарттарына қатаң сәйкестікте қамтамасыз ету міндеті қойылды.