Siemens Energy газ турбинасының генераторы орнатылды

«БГҚ Түркістан» алаңында Siemens Energy компаниясының жоғары технологиялық жабдығын шығарушы зауыт инженерлерінің қатысуымен газ турбинасының генераторының монтажы жүргізілді. Генераторды Бас корпусқа жеткізу өздігінен жүретін модульді платформа арқылы жүзеге асырылды. Одан әрі генератор 600 тонналық кранның көмегімен газ турбинасының жанына тұрақты жобалық орнына орнатылды.

Көтеру, позициялау және монтаждау бойынша негізгі операциялар жүк көтеру иіні, жебе шығымы және желге қойылатын шектеулер бойынша есептеулерді қамтитын бекітілген жұмыс өндірісі жобасына  сәйкес орындалды. Жұмыстар регламентке сай, қауіпсіздік талаптарын толық сақтай отырып, штаттық режимде жүзеге асырылды.

«Doosan компаниясы консорциумның жетекшісі ретінде жабдықтың шеф-монтажын орындап, барлық жұмыстарға бақылау жүргізді», – деді Doosan Enerbility жетекші механик-инженері Сержан Камзин.

EPC-мердігер «Integra Construction KZ» ЖШС өкілдері де барлық операциялардың дұрыс әрі үйлесімді орындалғанын атап өтті:
«Біз газ турбинасының генераторын алаңға жеткізіп, жобалық орнына орнаттық. Генератордың массасы 200 тоннадан асады. Жеткізу және монтаж жұмыстары сәтті өтті, барлық жоспарланған шаралар жоспарға сәйкес және ешқандай оқиғасыз орындалды», – деді «Integra Construction KZ» ЖШС «БГҚ Түркістан Құрылысы дирекциясының» құрылыс жөніндегі атқарушы директордың орынбасары Акан Аширбеков.

Siemens Energy өндірісіндегі газ турбинасының генераторы – ауа арқылы салқындатылатын, жоғары қуатты энергетикалық нысандарға арналған синхронды екіполюсті генератор. Оның қуаты 210 МВт-қа дейін жетеді. Генераторды орнату бұған дейін орындалған газ турбинасын монтаждау жұмыстарының қисынды жалғасы болып табылады. «Газ турбинасы + Генератор» күш блогын қалыптастыру жобаны келесі кезеңге – агрегатты жоғары дәлдікпен центрлеу және іске қосу-реттеу жұмыстарына дайындау кезеңіне ілгерілетеді.