«Түркістан БГҚ» алаңында газ турбинасының ауа қабылдау жүйесін монтаждау басталды

«Түркістан БГҚ» ЖШС құрылыс алаңында бірінші энергоблоктың газ турбинасы үшін ауа қабылдау жүйесін монтаждау басталды. Бұл торап газ турбиналық қондырғының құрамына кіреді және жабдықты алғашқы қуатты энергожүйеге беруге дайындаудағы маңызды кезеңдердің бірі болып табылады.

Ауа қабылдау жүйесі, немесе Air Intake System, атмосфералық ауа ағынын қабылдауды, оны тазартуды және компрессорға беруді қамтамасыз етеді. Ол ауа сорылған кездегі шуды төмендетеді, сондай-ақ қондырғыны шаңнан, жауын-шашыннан, қоқыстан, мұзданудан және басқа да сыртқы факторлардан қорғайды.

Монтаж барысы «Түркістан БГҚ» ЖШС Құрылысты бақылау департаментінің директоры Қуат Жылқыбаевтың басшылығымен өткен өндірістік қарау кезінде тексерілді. Оған Doosan Enerbility, «Integra Construction KZ» ЖШС, авторлық және техникалық қадағалау компанияларының, жобалау институттарының өкілдері, сондай-ақ «Түркістан БГҚ» ЖШС-нің бейінді мамандары қатысты.

Қатысушылар бас корпусты, электрқалқан үй-жайларын, қалдық жылу қазандықтарын орнату аймағын, сорғы станцияларын және өрт сөндіру пункттерін қарап шықты. Бірінші энергоблокта электрқалқан ғимаратының екі деңгейін дайындау, конструкцияларды арматуралау және металл конструкцияларды оттан қорғайтын бояумен өңдеу жұмыстары тексерілді.

Бас корпуста барлық төрт газ турбинасын қалдық жылу қазандықтарымен түйістіру жұмыстары жалғасуда. Бұл жұмыстар Siemens Energy өкілдерінің бақылауымен жүргізілуде.

Соңында 220/500 кВ ашық тарату құрылғысы учаскесі қаралды. Мамандар осы нысанға алдыңғы барудан бері атқарылған жұмыстарды тексеріп, хаттамаларда тіркелген тапсырмалардың орындалуын салыстырды. Қарау қорытындысы бойынша бейінді мамандарға бірінші энергоблоктың дайындығына әсер ететін учаскелердегі құрылыс және монтаж жұмыстарының кестелерін келісу тапсырылды.