«Түркістан БГҚ» Басқарма төрағасы Түркістан облысының әкімімен кездесті

«Түркістан БГҚ» ЖШС Басқарма төрағасы Қуаныш Бектеміров Түркістан облысының әкімі Нұралхан Күшеровпен жұмыс кездесуін өткізді.

Кеңесте өңірдегі ең ірі инвестициялық жобаның іске асырылу барысы – Сайрам ауданы аумағында қуаттылығы 1000 МВт-қа дейінгі бу-газ электр станциясының құрылысы қаралды. Энергетикалық нысан Қазақстан Республикасы Президенті Қасым-Жомарт Тоқаевтың тапсырмасына сәйкес салынып жатыр, жобаны іске асыру мерзімі – 2024–2026 жылдар.

Қуаныш Бектеміров облыс әкіміне құрылыс-монтаж жұмыстарының жүргізілу барысы туралы баяндады. Жоба 5 бағытта жүзеге асырылуда: негізгі алаң; 500 және 220 кВ кернеудегі электр энергиясын беру жүйесі; сыртқы газбен жабдықтау; кірме автомобиль жолы; су алу жүйесі. Бүгінгі таңда бетондау жұмыстарының 64 пайызы аяқталған, станцияның металлқұрылымдары мен жабдықтарын жеткізу жалғасып жатыр.

Кездесу барысында Түркістан облысының әкімі жоба өңір үшін маңызды екенін атап өтіп, оның сапалы әрі уақытылы іске асырылуы қажеттігін айтты, сондай-ақ электр станциясының құрылысына жан-жақты қолдау көрсетілетінін жеткізді.