«Түркістан БГҚ» бас корпусында төртінші қалдық жылу қазандығын монтаждау басталды

2026 жылғы 2 маусымда «Түркістан БГҚ» құрылыс алаңында төртінші, қорытынды қалдық жылу қазандығын монтаждау басталды. Жұмыстар станцияның негізгі генерациялаушы жабдығы орналасқан бас корпуста жүргізілуде. Жұмыстардың барысын «Түркістан БГҚ» ЖШС Басқарма төрағасы Ұлан Бүркітов, бас мердігерлік консорциум өкілдері - Doosan Enerbility және Integra Construction KZ кезекті өндірістік кеңес аясында қарап шықты.

Учаскеде қалдық жылу қазандығының тірек металл конструкцияларын монтаждау жұмыстары аяқталды: көтергіш колонналар, арқалықтар, байланыстар және қаңқа элементтері орнатылды. Конструкция осьтер мен биіктік белгілері бойынша жобалық қалыпқа келтірілді. Бұл келесі кезеңге - жылу алмастырғыш модульдер мен ілеспе жабдықты монтаждауға өтуге мүмкіндік береді. Бас корпуста №2 газ турбинасының диффузорын орнату жұмыстары да жалғасуда. Ұлан Бүркітов газ турбинасын, жалғау торабын және диффузорды түйістіру процесін қарап шықты. Орнату аяқталғаннан кейін мамандар осы элементтерді біріктіру бойынша дәнекерлеу жұмыстарына кіріседі.

Сонымен қатар осы жерде бірінші қалдық жылу қазандығының байпас құбырын монтаждау жүргізілуде. 5 сегменттің 4-еуі жобалық қалыпқа орнатылды, толық сақиналы дәнекерлеу жігі бойынша жұмыстар жалғасуда. Бұдан бөлек, аралау қатысушылары №1 блоктың электрқалқан ғимаратының 2-3-қабаттарындағы бетон жұмыстарының барысымен танысты. Аралау қорытындысы бойынша Ұлан Бүркітов жекелеген учаскелерде түнгі ауысымды күшейтуді және дәнекерлеу жұмыстарына тартылған мамандар санын арттыруды тапсырды.