«Түркістан БГҚ»-да критикалық жолдағы нысандардың дайындығы тексерілді

«Түркістан БГҚ» ЖШС басшылығы Басқарма төрағасы Ұлан Бүркітовтің жетекшілігімен қуаты 1000 МВт болатын салынып жатқан бу мен газ электр станциясының критикалық жолындағы учаскелерді тексерді. Бұл инфрақұрылымдық нысандардың дайындығына жобаны іске қосу мерзімі мен алғашқы электр энергиясын желіге беру тікелей байланысты.

Көшпелі кеңеске жоба инженерлері, техникалық және авторлық қадағалау мамандары, сондай-ақ мердігер ұйымдардың өкілдері қатысты. Негізгі құрылыс алаңында өндірістік аралауға Doosan Enerbility және Integra Construction KZ өкілдері қосылды.

Сыртқы электр желілері

Делегация қуатты энергожүйеге беруге тікелей әсер ететін 500/220 кВ желілердің құрылысын тексерді. Қазіргі уақытта ұзындығы 36 шақырымнан асатын 220 кВ «Шымкент - Састөбе» әуе желісінің құрылысы жүргізілуде. Жоба бойынша сыртқы электр желілерінің жалпы ұзындығы 111 шақырымнан асады.

«Бұл бағыттың дайындығына станцияны іске қосуды және қуатты энергожүйеге беруді өзара үйлестіру тікелей байланысты. Сондықтан жұмыстардың бекітілген кестеге сәйкес орындалуын қамтамасыз ету қажет», - деп атап өтті «Түркістан БГҚ» ЖШС Басқарма төрағасы Ұлан Бүркітов.

Сумен жабдықтау жүйесі

Бейінді алаңда тереңдігі шамамен 300 метр болатын жеті барлау ұңғымасын бұрғылау жұмыстары жүріп жатыр. Бұл кезеңнің уақытылы аяқталуы болашақ электр станциясын технологиялық процестерге және меншікті қажеттіліктерге арналған сумен қамтамасыз етуге мүмкіндік береді.

Бас корпус

Негізгі құрылыс алаңында жұмыстар белсенді кезеңде. Бірінші энергоблокта газ турбиналарын қалдық жылу қазандықтарымен түйістіру, автоматтандыру жүйелері мен қосалқы жабдықтарды монтаждау жалғасуда. Екінші энергоблокта №2.1 және №2.2 газ турбиналарының қалдық жылу қазандықтарының байпас құбырлары, сондай-ақ ауа қабылдау жүйелері монтаждалуда.

Инспекция барысында басшылық KEGOC белгілеген директивтік мерзімдердің сақталуына ерекше назар аударды. Қазіргі кезеңдегі басты міндет - құрылыс-монтаж жұмыстарын жеделдету, мердігер ұйымдардың жұмыс кестелерін үйлестіру және жекелеген учаскелерде үш ауысымды құрылыс режимін ұйымдастыру.

Критикалық жолдағы нысандарды бақылау жобаның іске қосу-баптау жұмыстарына уақытылы өтуіне және басты міндетті - алғашқы электр энергиясын Қазақстан энергожүйесіне беруді орындауға мүмкіндік береді.