«Түркістан БГҚ» сыртқы газбен жабдықтау нысандарының құрылысы 97%-ға аяқталды

«Түркістан БГҚ» ЖШС Басқарма төрағасы Ұлан Бүркітов компания инженерлерімен бірге болашақ қуаты 1000 МВт бу мен газ қондырғысы базасындағы электр станциясының сыртқы газбен жабдықтау нысандарын қарап шықты. Компания басшысы автоматтандырылған газ тарату станциясының құрылыс барысын, кран тораптарының жай-күйін және газ құбыры учаскелерін инспекциялады.

Қазіргі уақытта сыртқы газбен жабдықтау жобасының жалпы дайындығы 97,4%-ды құрайды. Жоспарланған 13,612 км газ құбырының 13,602 км нақты төселді. Автоматтандырылған газ тарату станциясы ғимаратының құрылысы мен негізгі жабдықты монтаждау толық аяқталды. Қазір нысанда реттеу-баптау жұмыстары және аумақты абаттандыру жүргізілуде.

Газ құбыры Түркістан облысы Сайрам ауданының аумағымен, Қарамұрт ауылының бойымен өтеді. 2024 жылғы қыркүйекте «Бейнеу - Бозой - Шымкент» магистральдық газ құбырына қосу жұмыстары сәтті орындалып, қосылу орнында кран торабы монтаждалды.

«Бу мен газ қондырғысы базасындағы электр станциясы үшін газдың тұрақты берілуі - жұмыстың негізгі шарты. Сондықтан сыртқы газ құбыры мен автоматтандырылған газ тарату станциясы бүкіл жоба үшін стратегиялық маңызға ие. Бұл станция қуаттарын жоспарланған мерзімде іске қосу үшін қажетті негіз қалыптастырады», - деп атап өтті Ұлан Бүркітов.

Жобалық шешімдер газ инфрақұрылымын қауіпсіз пайдалануды және экологиялық тәуекелдерді барынша азайтуды көздейді. «Түркістан БГҚ» құрылысы Түркістан облысы мен Шымкент қаласын қоса алғанда, Қазақстанның оңтүстік өңірлерін энергиямен жабдықтау сенімділігін арттыруға бағытталған.