«Түркістан БГҚ» және KEGOC станцияның алғашқы қуатын энергожүйеге беруге дайындықты талқылады

«Түркістан БГҚ» ЖШС Басқарма төрағасы Ұлан Бүркітов станцияның құрылыс алаңында «KEGOC» АҚ-ның «Оңтүстік жүйеаралық электр желілері» филиалының директоры Ерлан Шалбаев бастаған делегациясымен кездесті.Тараптар «Түркістан БГҚ» жобасының алғашқы қуатын энергожүйеге беруге дайындық мәселелерін талқылады. Кездесудің негізгі міндеті - станция, сыртқы электр желілері және жүйелік оператор арасындағы жұмыстар кестесін синхрондау. Сапар барысында KEGOC өкілдері «Түркістан БГҚ» ЖШС басшылығы мен инженерлерімен бірге автоматтандырылған басқару пункттерін, 500 кВ және 220 кВ ашық тарату құрылғыларын, сондай-ақ орнатылған күштік трансформаторларды қарап шықты. Аталған нысандар станция қуатын болашақта энергожүйеге берумен тікелей байланысты. «Өз тарапымыздан нысанды уақтылы қосуға барынша ықпал етеміз. Сапардың мақсаты - алғашқы қуатты қосу мүмкіндігін бағалау», - деп атап өтті «KEGOC» АҚ «Оңтүстік жүйеаралық электр желілері» филиалының директоры Ерлан Шалбаев. Жобаның қуатын беру үшін жалпы ұзындығы 111 км 595 м болатын 500 кВ және 220 кВ сыртқы электр желілері салынуда. Негізгі учаскелердің қатарында «Жамбыл - Шымкент», «Шымкент - Қызылсай», «Шымкент - Састөбе» және «Шымкент - Бозарық» әуе желілері бар. Кездесуден кейін Ұлан Бүркітов «Түркістан БГҚ» ЖШС инженерлерімен және бас мердігер «Электромонтаж» АҚ (ЭЛМО) өкілдерімен бірге сыртқы электр беру желілерінің құрылыс барысын инспекциялады. Сапар барысында қатысушылар тіректерді орнату жұмыстары мен ӘЖ трассасындағы жұмыстардың ағымдағы қарқынын қарады. Қазіргі таңда 220 кВ «Шымкент - Бозарық» ӘЖ учаскесінде 34 тірек орнатылған, оның 21-і соңғы екі аптада қойылды. Сыртқы желілердің дайындық деңгейі станцияны энергожүйеге қосудың және алғашқы қуатты берудің негізгі шарттарының бірі болып қала береді.