«Түркістан БГҚ» ЖШС: ҚМЖ қарқыны және алғашқы қуатты беруге дайындық

«Түркістан БГҚ» ЖШС Басқарма төрағасы Ұлан Бүркітов болашақ бу-газ электр станциясының құрылыс алаңында кезекті апталық көшпелі кеңес өткізді. Сапардың негізгі мақсаты — соңғы аптада орындалған жұмыстардың орындалу барысын тексеру және жобаның бекітілген кестеге сәйкес жүзеге асырылуын бақылау.

Іс-шараға «Түркістан БГҚ» ЖШС басшылығы, сондай-ақ Doosan Enerbility және Integra Construction KZ компанияларынан құралған бас мердігер консорциумының уәкілетті өкілдері қатысты.

Аумақты аралау барысында делегация жобаның барлық титулдары бойынша жұмыс барысымен танысты: «Түркістан облысы, Сайрам ауданы, қуаты 1000 МВт бу-газ қондырғысы базасындағы электр станциясын салу. Негізгі алаң. Сыртқы инженерлік желілерсіз». Қатысушылар нысандардағы ағымдағы өзгерістерді бағалап, туындаған мәселелерді талқылады және оларды шешу бойынша нақты шараларды айқындады.

Кеңес барысында 2026 жылы алғашқы қуатты беруді қамтамасыз ету мақсатында құрылыс-монтаж жұмыстарының кезеңділігі мен орындалу реттілігін жоспарлауға қатысты аса маңызды мәселелер қаралды. Талқылау қорытындысы бойынша Ұлан Бүркітов барлық титулдар бойынша ҚМЖ қарқынын күшейту жөнінде қатаң шаралар қабылдауды, сондай-ақ бекітілген мерзімдерді бұлжытпай сақтау үшін қосалқы нысандардағы өндірістік персонал санын едәуір арттыруды тапсырды.